మహిళా సాధికారతతోనే నవ సమాజ నిర్మాణం

ఏలూరులో ఘనంగా మహిళా వారోత్సవాల ప్రారంభం

ఏలూరు, మార్చి 1: మహిళా సాధికారతతోనే నవ సమాజ నిర్మాణం సాధ్యమని జిల్లా ఎస్పీ కె. ప్రతాప్ శివ కిషోర్ ఐపీఎస్ ఆదేశాల మేరకు ఏలూరులో మహిళా వారోత్సవాలను ఘనంగా ప్రారంభించినట్లు జిల్లా అదనపు ఎస్పీ (అడ్మిన్) సి.ఎన్. సూర్యచంద్రరావు తెలిపారు.

మార్చి 8న జరిగే ప్రపంచ మహిళా దినోత్సవాన్ని పురస్కరించుకొని జిల్లా వ్యాప్తంగా మార్చి 1 నుండి 8వ తేదీ వరకు మహిళా వారోత్సవాలు నిర్వహిస్తున్నారు. ఇందులో భాగంగా ఆదివారం ఏలూరు నగరంలో భారీ అవగాహన ర్యాలీ నిర్వహించి కార్యక్రమాలకు శ్రీకారం చుట్టారు.

జిల్లా అదనపు ఎస్పీ సి.ఎన్. సూర్యచంద్రరావు నేతృత్వంలో ఏలూరు పోలీస్ సంక్షేమ భవనం నుండి ఫైర్ స్టేషన్ సెంటర్ వరకు ఈ ర్యాలీ ఉత్సాహంగా సాగింది.

ఈ కార్యక్రమంలో డీఎస్పీ డి. శ్రావణ్ కుమార్, మహిళా పోలీస్ స్టేషన్ డీఎస్పీ యు. రవిచంద్ర, మహిళా పోలీస్ స్టేషన్ ఇన్‌స్పెక్టర్ ఎం. సుబ్బారావు, ఏలూరు 3 టౌన్ ఇన్‌స్పెక్టర్ కోటేశ్వరరావు, ట్రాఫిక్ ఎస్‌ఐ శ్రీధర్, మహిళా ఎస్‌ఐ నాగమణి, మహిళా పోలీస్ సిబ్బంది, సెక్యూరిటీ సిబ్బంది మరియు పెద్ద సంఖ్యలో విద్యార్థులు పాల్గొన్నారు.

ర్యాలీ అనంతరం అదనపు ఎస్పీ సూర్యచంద్రరావు మాట్లాడుతూ మహిళా దినోత్సవం ప్రాముఖ్యతను వివరించారు. సమాన హక్కులు, సమాన గౌరవం మహిళలకు అందాలని, మహిళలు పురుషులతో సమానంగా అన్ని రంగాల్లో రాణించాలని సూచించారు. చట్టబద్ధంగా మహిళలకు లభించే హక్కులపై ప్రతి ఒక్కరూ అవగాహన కలిగి ఉండాలని కోరారు.

పని ప్రదేశాల్లో మహిళలు సమాన వేతనం పొందడం మరియు గౌరవప్రదమైన వాతావరణంలో పనిచేయడం వారి హక్కు అని తెలిపారు. మహిళల రక్షణ కోసం ప్రభుత్వం, పోలీస్ శాఖ అనేక చట్టాలు మరియు శక్తి యాప్ వంటి సేవలను అందుబాటులోకి తీసుకువచ్చాయని, వాటిని సద్వినియోగం చేసుకోవాలని సూచించారు.

మహిళా వారోత్సవాల సందర్భంగా వారం రోజుల పాటు జిల్లా వ్యాప్తంగా మహిళా చట్టాలపై అవగాహన కార్యక్రమాలు, మహిళల విజయాలను గుర్తుచేసే కార్యక్రమాలు నిర్వహిస్తామని తెలిపారు.

"మహిళా శక్తికి వందనం" అనే నినాదాలతో సాగిన ఈ ర్యాలీ ప్రజలను విశేషంగా ఆకట్టుకుంది. విద్యార్థినులు ప్లకార్డుల ద్వారా మహిళా సాధికారతపై సందేశాలు అందించారు. మహిళా పోలీస్ సిబ్బంది మరియు విద్యార్థినుల ఉత్సాహంతో కార్యక్రమం విజయవంతమైంది.