ఏలూరు, జూలై 4: రాష్ట్రంలోని నీటివనరుల నిల్వ సామర్థ్యాన్ని పెంచడంతో పాటు భూగర్భ జలాల వృద్ధిని లక్ష్యంగా పెట్టుకుని చేపట్టిన **జలధార–జలహారతి** కార్యక్రమం పనులను నిర్దేశిత గడువులోగా పూర్తి చేయాలని రాష్ట్ర ముఖ్యమంత్రి నారా చంద్రబాబునాయుడు జిల్లా కలెక్టర్లు, జలవనరుల శాఖ అధికారులను ఆదేశించారు.
శనివారం సాయంత్రం రాష్ట్ర సచివాలయం నుంచి జలధార–జలహారతి కార్యక్రమం పురోగతిపై ముఖ్యమంత్రి చంద్రబాబునాయుడు జూమ్ కాన్ఫరెన్స్ ద్వారా సమీక్ష నిర్వహించారు. ఈ సమావేశంలో రాష్ట్ర జలవనరుల శాఖ మంత్రి నిమ్మల రామానాయుడు, ప్రత్యేక ప్రధాన కార్యదర్శి శశిభూషణ్ కుమార్, జలవనరుల శాఖ ఉన్నతాధికారులు, రాష్ట్రంలోని అన్ని జిల్లాల కలెక్టర్లు పాల్గొన్నారు.
ఈ సందర్భంగా ముఖ్యమంత్రి మాట్లాడుతూ, జల సంరక్షణకు సంబంధించిన పనులను అత్యంత ప్రాధాన్యంతో చేపట్టి, నిర్దేశించిన గడువులోగా నాణ్యతతో పూర్తి చేయాలని సూచించారు. కురిసే ప్రతి వర్షపు నీటి చుక్కను సద్వినియోగం చేసుకునేలా చెరువులు, కాలువలు, ఇతర నీటి వనరుల అభివృద్ధి పనులను సమర్థవంతంగా అమలు చేయాలని అధికారులకు దిశానిర్దేశం చేశారు.
ఏలూరు జిల్లా కలెక్టరేట్ నుంచి జిల్లా కలెక్టర్ కె. వెట్రిసెల్వి జూమ్ సమావేశంలో పాల్గొని జిల్లాలో జలధార–జలహారతి కార్యక్రమం అమలు, పనుల పురోగతిపై వివరాలు వెల్లడించారు. సమావేశంలో డ్వామా పీడీ సుబ్బారావు, ఇరిగేషన్ శాఖ అధికారులు పాల్గొన్నారు.
_11zon.png)
