చిత్తూరు: నగరంలో ఊహించని ఘటన కలకలం రేపుతోంది. నగర నడిబొడ్డునే చిరుత పులి సంచారం కనిపించడంతో ప్రజలు ఒక్కసారిగా భయాందోళనకు గురయ్యారు. నగరానికి సమీపంలోని దొడ్డిపల్లి ప్రాంతంలోని జగనన్న లేఔట్లో గత మూడు రోజులుగా చిరుత తిరుగుతున్నట్లు సమాచారం రావడంతో స్థానికుల్లో భయం మరింత పెరిగింది.
నివాస ప్రాంతంలోనే చిరుత కనిపించడం ప్రజలను తీవ్రంగా కలవరపెడుతోంది. ఇళ్ల బయటకు రావడానికి కూడా చాలామంది వెనుకాడుతున్నారు. ముఖ్యంగా చిన్నపిల్లలు, వృద్ధులు బయటకు వెళ్లకుండా కుటుంబ సభ్యులు జాగ్రత్తలు తీసుకుంటున్నారు. ఈ పరిణామంతో కాలనీలో ఉద్రిక్త వాతావరణం నెలకొంది. ఇంతలో గాయాలపాలై స్పృహ తప్పి పడిపోయిన చిరుత పులి కనిపించడం పరిస్థితిని మరింత ఉద్రిక్తంగా మార్చింది. స్థానికులు వెంటనే అప్రమత్తమై అటవీశాఖ అధికారులకు సమాచారం అందించారు. సంఘటనా స్థలానికి చేరుకున్న అధికారులు పరిస్థితిని సమీక్షిస్తూ తదుపరి చర్యలు ప్రారంభించారు.
మరోవైపు కాలనీవాసులు మాత్రం భయంతో వణికిపోతున్నారు. ఎప్పుడెప్పుడు రెస్క్యూ బృందం వచ్చి చిరుతను అక్కడి నుంచి తరలిస్తుందా అని ఆత్రుతగా ఎదురుచూస్తున్నారు. ఈ ఘటనతో ప్రాంతంలో తీవ్ర ఉత్కంఠ నెలకొంది. అటవీశాఖ అధికారులు ప్రజలకు కీలక సూచనలు చేస్తున్నారు. ఎవ్వరూ చిరుతకు దగ్గరగా వెళ్లవద్దని, అనవసరంగా గుంపులు కట్టవద్దని హెచ్చరిస్తున్నారు. భద్రత కోసం అందరూ ఇళ్లలోనే ఉండాలని సూచిస్తున్నారు.
ఈ ఘటనతో చిత్తూరు నగర పరిసర ప్రాంతాల్లో అడవి జంతువుల సంచారం పెరుగుతోందనే ఆందోళనలు వ్యక్తమవుతున్నాయి. అటవీ ప్రాంతాలు క్రమంగా తగ్గిపోవడం, ఆహారం కోసం జంతువులు పట్టణాల వైపు వస్తుండటమే ఇందుకు కారణమని భావిస్తున్నారు. ప్రస్తుతం అందరి దృష్టి రెస్క్యూ ఆపరేషన్పైనే ఉంది. అధికారులు త్వరితగతిన చర్యలు తీసుకుని చిరుతను సురక్షితంగా తరలించాలని, ప్రజల్లో భరోసా కల్పించాలని స్థానికులు కోరుతున్నారు.
