ఏలూరు, జూన్ 17: జిల్లాలో గర్భస్థ శిశు లింగ నిర్ధారణ పరీక్షలు నిర్వహించే వారిపై కఠిన చట్టపరమైన చర్యలు తీసుకుంటామని జిల్లా కలెక్టర్ కె. వెట్రిసెల్వి హెచ్చరించారు. జిల్లా కలెక్టరేట్ గౌతమీ సమావేశ మందిరంలో బుధవారం నిర్వహించిన **పీసీ-పీఎన్డీటీ చట్టం అమలు, సరోగసీ చట్టం అమలు కమిటీ** సమీక్ష సమావేశంలో ఆమె అధికారులకు కీలక ఆదేశాలు జారీ చేశారు.
ఈ సందర్భంగా కలెక్టర్ మాట్లాడుతూ, జిల్లాలో పీసీ-పీఎన్డీటీ చట్టం అమలుపై మరింత పటిష్టమైన పర్యవేక్షణ చేపట్టాలని సూచించారు. గర్భస్థ శిశు లింగ నిర్ధారణ వంటి అక్రమ కార్యకలాపాలను అరికట్టేందుకు ప్రత్యేక చర్యలు తీసుకోవాలని అధికారులను ఆదేశించారు.
ప్రజల నుంచి వైద్య సంబంధిత ఫిర్యాదులు, అక్రమ కార్యకలాపాలపై సమాచారం స్వీకరించేందుకు ప్రభుత్వం ఏర్పాటు చేసిన **టోల్ఫ్రీ నంబర్ 1800-233-2447**ను విస్తృతంగా ప్రచారం చేయాలని తెలిపారు. ఈ సేవలను ప్రజలు సద్వినియోగం చేసుకునేలా అవగాహన కల్పించాలని సూచించారు.
అక్రమ లింగ నిర్ధారణ పరీక్షలను అరికట్టేందుకు జిల్లాలో తరచూ డీకాయ్ ఆపరేషన్లు నిర్వహించాలని, ప్రైవేట్ స్కానింగ్ కేంద్రాలను క్రమం తప్పకుండా తనిఖీ చేసి నిబంధనల అమలును పర్యవేక్షించాలని అధికారులను ఆదేశించారు. అలాగే మండల స్థాయిలో సమావేశాలు నిర్వహించి ఆశా కార్యకర్తలకు ప్రత్యేక అవగాహన కార్యక్రమాలు చేపట్టాలని సూచించారు.
జిల్లాలోని అన్ని మెడికల్ షాపులను తనిఖీ చేసి పూర్తి నివేదికలు సమర్పించాలని సహాయ ఔషధ నియంత్రణ అధికారిని కలెక్టర్ ఆదేశించారు. మహిళా శిశు సంక్షేమానికి భంగం కలిగించే అక్రమ కార్యకలాపాలను పూర్తిగా నిర్మూలించేందుకు అన్ని శాఖలు సమన్వయంతో పనిచేయాలని ఆమె పిలుపునిచ్చారు.
ఈ సమావేశంలో జిల్లా వైద్య ఆరోగ్యశాఖ అధికారి డా. యు. శోభ, జిల్లా వైద్య సేవల సమన్వయ అధికారి డా. సి.హెచ్. బేబీ కమల, గైనకాలజిస్ట్ డా. భవాని, శిశు వైద్య నిపుణురాలు డా. ప్రియదర్శిని, సహాయ ఔషధ నియంత్రణ అధికారి చక్రధర్తో పాటు వివిధ శాఖల అధికారులు పాల్గొన్నారు.
