ఏలూరు, జూలై 16: ఆంధ్రప్రదేశ్ నర్సరీ చట్టం ప్రకారం జిల్లాలోని అన్ని నర్సరీల నిర్వాహకులు, రైతులు తప్పనిసరిగా నిబంధనలు పాటించాలని జిల్లా ఉద్యాన అధికారి కె. సాజ నాయక్ సూచించారు. లైసెన్స్ లేకుండా నర్సరీలు నిర్వహించడం, నాణ్యతలేని మొక్కలను విక్రయించడం, తప్పుడు సమాచారంతో రైతులను మోసగించడం వంటి చర్యలు చట్టవిరుద్ధమని, అలాంటి వారిపై కఠిన చర్యలు తీసుకుంటామని హెచ్చరించారు.
ఈ సందర్భంగా ఆయన మాట్లాడుతూ, నర్సరీ యజమానులు కొబ్బరి నాట్ల తయారీ కోసం విత్తన కొబ్బరికాయలను **కొబ్బరి అభివృద్ధి బోర్డు** సూచించిన నిబంధనల మేరకే సేకరించాలని తెలిపారు. రైతుల పొలాల్లో రాలిన లేదా నాణ్యతలేని కొబ్బరి మొలకలను నాట్లుగా తయారు చేసి విక్రయించరాదని స్పష్టం చేశారు. రైతులు కూడా ధృవీకరించబడిన నర్సరీల నుంచే మొక్కలను కొనుగోలు చేసి తప్పనిసరిగా బిల్లు తీసుకోవాలని సూచించారు.
నర్సరీ చట్ట నిబంధనలను ఉల్లంఘించే వారిపై చట్టబద్ధంగా చర్యలు తీసుకుంటామని తెలిపారు. నర్సరీల నిర్వహణలో ఎలాంటి అక్రమాలు లేదా నిబంధనల ఉల్లంఘనలు కనిపించినా వెంటనే ఉద్యాన శాఖ కార్యాలయానికి సమాచారం అందించాలని ప్రజలను కోరారు.
కొత్తగా నర్సరీలు ఏర్పాటు చేయాలనుకునే రైతులకు ఉద్యాన శాఖ ద్వారా రాయితీలు అందుబాటులో ఉన్నాయని తెలిపారు. ఆసక్తి ఉన్న రైతులు జిల్లా ఉద్యాన అధికారి కార్యాలయం లేదా సమీప ఉద్యాన అధికారులను సంప్రదించాలని సూచించారు. అలాగే ఆగిరిపల్లి మండలం వడ్లమాను గ్రామంలో లైసెన్స్ లేకుండా నర్సరీ నిర్వహిస్తున్నట్లు గుర్తించడంతో, సంబంధిత నిర్వాహకులకు నర్సరీ చట్టం ప్రకారం వెంటనే లైసెన్స్ కోసం దరఖాస్తు చేసుకోవాలని ఉద్యాన శాఖ అధికారులు ఆదేశాలు జారీ చేసినట్లు కె. సాజ నాయక్ తెలిపారు.
