కొత్తపేట, మే 8: వానపల్లి శివారు రామ్మోహన్పేటలో జరిగిన వివాహ వేడుకలో ఫుడ్ పాయిజన్కు గురైన బాధితులను ఎమ్మెల్యే Bandaru Satyananda Rao గురువారం కొత్తపేట ప్రభుత్వ ఆసుపత్రిలో పరామర్శించారు. చికిత్స పొందుతున్న బాధితులకు ధైర్యం చెబుతూ, మెరుగైన వైద్యం అందించాలని వైద్యులకు సూచించారు.
బుధవారం మధ్యాహ్నం జరిగిన వివాహ విందులో భోజనం చేసిన 35 మందికి పైగా మహిళలు, యువకులు, చిన్నారులు అస్వస్థతకు గురైనట్లు సమాచారం. మొదట బాధితులను వానపల్లి ప్రాథమిక ఆరోగ్య కేంద్రానికి తరలించగా, అనంతరం మెరుగైన చికిత్స కోసం కొత్తపేట కమ్యూనిటీ హెల్త్ సెంటర్కు తరలించారు.
ఈ సందర్భంగా ఎమ్మెల్యే మాట్లాడుతూ ఒకే రకమైన భోజనం చేసిన వారిలో ఎక్కువగా ఫుడ్ పాయిజన్ లక్షణాలు కనిపిస్తున్నాయని తెలిపారు. బాధితుల ఆరోగ్య పరిస్థితిని వైద్యులను అడిగి తెలుసుకుని, వారికి ప్రత్యేక పర్యవేక్షణలో చికిత్స అందిస్తున్నట్లు పేర్కొన్నారు. రక్త నమూనాలను సేకరించి పరీక్షల కోసం పంపించామని చెప్పారు.
ఎవరైనా తీవ్రమైన పరిస్థితిలో ఉంటే వెంటనే రాజమహేంద్రవరం ప్రభుత్వాసుపత్రికి తరలించేలా ఏర్పాట్లు చేసినట్లు ఎమ్మెల్యే తెలిపారు. ప్రస్తుతం బాధితులందరూ వైద్యుల పర్యవేక్షణలో ఉన్నారని, ఎటువంటి ప్రాణాపాయం లేదని వైద్యులు వెల్లడించారని పేర్కొన్నారు.
గ్రామ పెద్దలు, వైద్య సిబ్బంది కలిసి పరిస్థితిని పర్యవేక్షిస్తున్నారని ఎమ్మెల్యే తెలిపారు. పరీక్షల నివేదికలు వచ్చిన తర్వాత అవసరమైన చికిత్స అందిస్తామని, బాధితులందరూ త్వరలోనే కోలుకుంటారని ఆశాభావం వ్యక్తం చేశారు.
