ఆంధ్రప్రదేశ్, AUG, 11: అగ్రిగోల్డ్ వ్యవహారంలో బాధితులకు న్యాయం చేసే దిశగా ఆంధ్రప్రదేశ్ ప్రభుత్వం మరో కీలక అడుగు వేసింది. ఈ కేసులో అదనపు ఆస్తులను జప్తు చేయాలని ఆదేశిస్తూ ఏపీ హోంశాఖ తాజాగా అధికారిక ఉత్తర్వులు జారీ చేసింది. ఇందులో భాగంగా మొత్తం 9.87 ఎకరాల విలువైన భూములను అటాచ్ చేసేందుకు సీఐడీ డీజీకి స్పష్టమైన మార్గదర్శకాలు జారీ అయ్యాయి.
కృష్ణా జిల్లా పరిధిలోని పోరంకి, పెనమలూరు, ఈదర ప్రాంతాల్లో విస్తరించి ఉన్న 6.55 ఎకరాల భూమితో పాటు, పొరుగు రాష్ట్రమైన కర్ణాటకలోని అనేకల్ ప్రాంతంలో ఉన్న 3.32 ఎకరాల స్థలాన్ని హోంశాఖ జప్తు చేయనుంది. అగ్రిగోల్డ్ సంస్థ యాజమాన్యం అమాయక డిపాజిటర్ల సొమ్మును అక్రమంగా మళ్లించి ఈ ఆస్తులను కొనుగోలు చేసినట్లు విచారణాధికారులు ప్రాథమికంగా నిర్ధారించారు. దీంతో “డిపాజిటర్ల పరిరక్షణ చట్టం” కింద ఈ నిర్ణయం తీసుకున్నారు.
లక్షలాది మంది బాధితులకు ఉపశమనం కలిగించేందుకు ప్రభుత్వం ఇప్పటికే ప్రత్యేక కోర్టు ఏర్పాటుకు సిద్ధమవుతోంది. గతంలో ఎన్ఫోర్స్మెంట్ డైరెక్టరేట్ (ED), ఏపీ సీఐడీ సంయుక్తంగా వేల కోట్ల రూపాయల విలువైన ఆస్తులను జప్తు చేసి, బాధితులకు పంపిణీ చేసేందుకు న్యాయస్థాన అనుమతులు పొందాయి. కొత్తగా గుర్తించిన బినామీ, అక్రమ ఆస్తులను వేలం వేసి వచ్చిన మొత్తాన్ని డిపాజిటర్లకు అందజేసే ప్రక్రియను వేగవంతం చేయాలని ప్రభుత్వం ఆదేశించింది. ఈ చర్యలతో ఏళ్ల తరబడి వేచి చూస్తున్న అగ్రిగోల్డ్ బాధితుల్లో మళ్లీ ఆశలు చిగురిస్తున్నాయి.
