ప్రజల ముంగిటకే రెవెన్యూ సేవలు: ఎమ్మెల్యే చింతమనేని ప్రభాకర్
దెందులూరు, మే 7: ప్రజలకు ప్రభుత్వ సేవలను మరింత చేరువ చేయాలనే లక్ష్యంతో రాష్ట్ర ప్రభుత్వం ప్రవేశపెట్టిన “ఒక నెల – ఒక గ్రామం – నాలుగు సందర్శనలు” కార్యక్రమం దెందులూరు నియోజకవర్గంలో ఘనంగా ప్రారంభమైంది. గురువారం పెదవేగి మండలం విజయరాయి గ్రామంలో నిర్వహించిన గ్రామసభలో దెందులూరు ఎమ్మెల్యే Chintamaneni Prabhakar ముఖ్య అతిథిగా పాల్గొన్నారు.
ఈ సందర్భంగా ఎమ్మెల్యే మాట్లాడుతూ ప్రజలు తమ సమస్యల పరిష్కారం కోసం కార్యాలయాల చుట్టూ తిరగాల్సిన అవసరం లేకుండా గ్రామస్థాయిలోనే సమస్యలను పరిష్కరించేందుకు ప్రభుత్వం ఈ వినూత్న కార్యక్రమాన్ని తీసుకొచ్చిందన్నారు. ఒక గ్రామాన్ని అధికారులు నెలలో నాలుగు సార్లు సందర్శించడం ద్వారా స్థానిక సమస్యలను గుర్తించి శాశ్వత పరిష్కారం చూపే అవకాశం ఉంటుందని వివరించారు.
రెవెన్యూ శాఖ ద్వారా అందించే సేవలు పూర్తిగా పారదర్శకంగా ఉండాలని ఎమ్మెల్యే చింతమనేని ప్రభాకర్ స్పష్టం చేశారు. ముఖ్యంగా భూ రికార్డులు, పట్టాదారు పాస్ పుస్తకాలు, ధ్రువీకరణ పత్రాలకు సంబంధించిన సమస్యలను సత్వరమే పరిష్కరించాలని అధికారులను ఆదేశించారు. మొదటి గురువారం స్వీకరించిన అర్జీలను పరిష్కార దిశగా తీసుకెళ్లి, తదుపరి సందర్శనల్లో వాటి పురోగతిని గ్రామస్తులకు తెలియజేయాలని సూచించారు.
నాలుగో వారానికి గ్రామంలో పెండింగ్ సమస్యలు లేకుండా చేయాలనే లక్ష్యంతో అధికారులు పనిచేయాలని ఎమ్మెల్యే సూచించారు. క్షేత్రస్థాయిలో అధికారులు చొరవ చూపి ప్రజలకు జవాబుదారీతనంతో సేవలు అందించాలని హితవు పలికారు.
కూటమి ప్రభుత్వం ప్రజా సంక్షేమానికి ప్రాధాన్యత ఇస్తోందని, ప్రతి గ్రామం అభివృద్ధి పథంలో ముందుకు సాగాలని ఎమ్మెల్యే ఆకాంక్షించారు. ప్రజల నుంచి వచ్చిన వినతులపై వెంటనే స్పందించి తదుపరి సందర్శన నాటికి పురోగతి కనిపించేలా చర్యలు తీసుకోవాలని అధికారులకు సూచించారు.
ఈ గ్రామసభలో మండల తహసీల్దార్ భ్రమరాంబ, ఎంపీడీవో నాగేంద్ర, పలువురు మండల స్థాయి అధికారులు, గ్రామ రెవెన్యూ సిబ్బంది, కూటమి నాయకులు మరియు పెద్ద సంఖ్యలో గ్రామస్తులు పాల్గొన్నారు.
