ఏలూరు, జూన్ 21: మానసిక ప్రశాంతత, శారీరక దృఢత్వం కోసం యోగా ఉత్తమ సాధనమని, ప్రతి ఒక్కరూ రోజువారీ జీవితంలో యోగాను భాగంగా చేసుకోవాలని ఉమ్మడి పశ్చిమ గోదావరి జిల్లా న్యాయ సేవాధికార సంస్థ చైర్పర్సన్ మరియు జిల్లా ప్రధాన న్యాయమూర్తి S. Sridevi శ్రీమతి ఎస్. శ్రీదేవి పేర్కొన్నారు.
జాతీయ న్యాయ సేవాధికార సంస్థ, న్యూఢిల్లీ మరియు రాష్ట్ర న్యాయ సేవాధికార సంస్థ, అమరావతి ఆదేశాల మేరకు 12వ అంతర్జాతీయ యోగా దినోత్సవం-2026 సందర్భంగా జిల్లా న్యాయ సేవాధికార సంస్థ భవనంలో ఆదివారం యోగా కార్యక్రమం నిర్వహించారు. ఈ కార్యక్రమం 7వ అదనపు జిల్లా జడ్జి Y. Srinivasa Rao వై. శ్రీనివాసరావు అధ్యక్షతన జరిగింది.
యోగా గురువు చంద్రశేఖర్ ఆధ్వర్యంలో న్యాయమూర్తులు, న్యాయవాదులు, కోర్టు సిబ్బంది యోగా ఆసనాలు అభ్యసించారు.
ఈ సందర్భంగా జిల్లా ప్రధాన న్యాయమూర్తి శ్రీమతి ఎస్. శ్రీదేవి మాట్లాడుతూ, యోగా శారీరక, మానసిక ఆరోగ్య పరిరక్షణలో కీలక పాత్ర పోషిస్తుందని అన్నారు. ప్రతిరోజూ కొంత సమయం యోగాకు కేటాయించడం ద్వారా ఒత్తిడిని తగ్గించుకోవడంతో పాటు ఆరోగ్యవంతమైన జీవనశైలిని అలవర్చుకోవచ్చని తెలిపారు. యోగా శరీరాన్ని దృఢంగా, మనస్సును ప్రశాంతంగా ఉంచడంలో ఎంతో ఉపయోగకరమని పేర్కొన్నారు.
7వ అదనపు జిల్లా జడ్జి వై. శ్రీనివాసరావు మాట్లాడుతూ, ఆధునిక జీవన విధానంలో ప్రతి వ్యక్తి మానసిక ఒత్తిడికి గురవుతున్నారని, యోగాభ్యాసం ద్వారా ఆ ఒత్తిడిని అధిగమించవచ్చని చెప్పారు. ప్రతి వ్యక్తి రోజుకు కనీసం ఒక గంట సమయం వ్యాయామం, యోగాకు కేటాయించి సంపూర్ణ ఆరోగ్యాన్ని పొందాలని సూచించారు.
ఈ కార్యక్రమంలో జిల్లా న్యాయ సేవాధికార సంస్థ కార్యదర్శి N. Srilakshmi శ్రీమతి ఎన్. శ్రీలక్ష్మి, ప్రిన్సిపల్ సీనియర్ సివిల్ జడ్జి M. Prameela Rani ఎం. ప్రమీలా రాణి, బార్ అసోసియేషన్ అధ్యక్షుడు Kone Sitaram కోనే సీతారాం, ఇతర న్యాయమూర్తులు, కోర్టు ఉద్యోగులు, సిబ్బంది పాల్గొన్నారు.
