పోలీస్ స్టేషన్‌లో ఆటోడ్రైవర్‌పై దాష్టీకం.. ఆర్టీఐతో వెలుగులోకి వచ్చిన అకృత్యం!

తమిళనాడులో మరో పోలీస్ దాష్టీకం వెలుగులోకి

తేని జిల్లా పోలీస్ స్టేషన్‌లో ఆటో డ్రైవర్‌పై పోలీసుల దాడి

ఆర్టీఐ ద్వారా బయటపడ్డ సీసీటీవీ దృశ్యాలు

సోషల్ మీడియాలో వైరల్ కావడంతో తీవ్ర కలకలం

NATIONAL:కస్టడీ మరణం ఘటనపై తమిళనాడులో తీవ్ర ఆగ్రహావేశాలు వ్యక్తమవుతున్న వేళ.. మరో పోలీస్ దాష్టీకం వెలుగులోకి వచ్చి కలకలం రేపుతోంది. తేని జిల్లాలోని ఓ పోలీస్ స్టేషన్‌లో ఆటో డ్రైవర్‌ను పోలీసులు విచక్షణా రహితంగా కొడుతున్న సీసీటీవీ ఫుటేజ్ సోషల్ మీడియాలో వైరల్ కావడంతో ఈ దారుణం బట్టబయలైంది.

తేని జిల్లా దేవదానపట్టికి చెందిన సి. రమేశ్ (34) అనే ఆటో డ్రైవర్‌ను ఈ ఏడాది జనవరి 14న పోలీసులు అదుపులోకి తీసుకున్నారు. అరిసికడై బస్టాప్ వద్ద మద్యం మత్తులో ప్రజలకు ఇబ్బంది కలిగిస్తున్నాడన్న ఫిర్యాదులతో అతన్ని స్టేషన్‌కు తరలించారు. అక్కడ పలువురు పోలీసులు కలిసి రమేశ్‌పై లాఠీలతో దాడి చేశారు. అనంతరం, భారతీయ న్యాయ సంహిత (బీఎన్ఎస్) సెక్షన్ 296 కింద కేసు నమోదు చేసి, స్టేషన్ బెయిల్‌పై విడుదల చేశారు.

ఆర్టీఐతో వెలుగులోకి నిజం

ఈ ఘటన జరిగిన దాదాపు ఆరు నెలల తర్వాత ఇప్పుడు వెలుగులోకి రావడం గమనార్హం. అదే రోజు వేరే పని మీద పోలీస్ స్టేషన్‌కు వెళ్లిన ఓ న్యాయవాది తన హాజరును ధ్రువీకరించుకోవడానికి సమాచార హక్కు చట్టం (ఆర్టీఐ) కింద దరఖాస్తు చేశారు. నెల రోజుల తర్వాత జిల్లా పోలీసులు స్పందించి, అప్పటి సీసీటీవీ ఫుటేజ్‌ను అందించారు. ఆ ఫుటేజ్‌లో రమేశ్‌ను పోలీసులు కొడుతున్న దృశ్యాలు రికార్డ్ అయ్యాయి. మొదట న్యాయవాదుల మధ్యే ఉన్న ఈ వీడియో నిన్న 2న సోషల్ మీడియాలో పోస్ట్ కావడంతో వైరల్‌గా మారింది. శివగంగ జిల్లాలో అజిత్‌కుమార్ అనే యువకుడి కస్టడీ మరణంపై దుమారం రేగుతున్న సమయంలో ఈ వీడియో బయటకు రావడంతో ప్రజల నుంచి తీవ్ర వ్యతిరేకత వ్యక్తమవుతోంది.

విచారణకు ఆదేశించిన ఉన్నతాధికారులు 

ఈ వీడియో వైరల్ కావడంతో తేని జిల్లా పోలీసులు ఒక ప్రకటన విడుదల చేశారు. రమేశ్‌పై కస్టడీ టార్చర్ జరగలేదని, మద్యం మత్తులో అదుపు తప్పి ప్రవర్తించడంతో అతన్ని నియంత్రించడానికి ‘అవసరమైన కనీస బలం’ మాత్రమే ఉపయోగించామని అందులో పేర్కొన్నారు.

అయితే, ఈ ఘటనపై తేని జిల్లా ఎస్పీ ఆర్. శివప్రసాద్ స్పందించారు. అదనపు ఎస్పీ నేతృత్వంలో శాఖాపరమైన విచారణకు ఆదేశించారు. విచారణ పూర్తయ్యే వరకు ఇన్‌స్పెక్టర్ కె. అబ్దుల్లా, స్పెషల్ సబ్-ఇన్‌స్పెక్టర్ శివ శంభు, హెడ్ కానిస్టేబుల్ ఎస్. పాండియన్, కానిస్టేబుళ్లు మరిచామి, వలిరాజన్‌లను ఆర్మ్డ్ రిజర్వ్ (ఏఆర్) విభాగానికి బదిలీ చేశారు. ఈ ఘటనతో రాష్ట్రవ్యాప్తంగా పోలీస్ స్టేషన్లలో జవాబుదారీతనం పెంచాలని, కస్టడీ హింసకు వ్యతిరేకంగా కఠినమైన చర్యలు తీసుకోవాలని హక్కుల కార్యకర్తలు డిమాండ్ చేస్తున్నారు.